
第一世噶玛巴教言集1KM23དགྱེས་རྡོར་གྱི་ཏིང་ངེ་འཛིན་གྱི་དབང་བསྐུར་བའི་ལག་ལེན་བཞུགས་སོ། །
1-2-172b
༄༅། །དགྱེས་རྡོར་གྱི་ཏིང་ངེ་འཛིན་གྱི་དབང་བསྐུར་བའི་ལག་ལེན་བཞུགས་སོ། །
༄༅། །དགྱེས་རྡོར་གྱི་ཏིང་ངེ་འཛིན་གྱི་དབང་བསྐུར་བའི་ལག་ལེན་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །གནས་ཁང་ཡིད་དང་འཐུན་པར་བླ་རེ་དང་འགྲིག་ཡོལ་དང་དར་གྱི་ལྡ་ལྡི་ལ་སོགས་པ་ཡིད་འཇུག་པའི་གནས་སུ་མཎྜལ་ལེགས་པར་བྱས་ལ་རྣམ་ལྔ་དང་དྲི་བཟང་པོ་དང་བདུད་རྩིས་ལེགས་པར་བྱུགས། དེའི་དབུས་སུ་པདྨ་འདབ་མ་བརྒྱད་པ་བྲིས་ལ་ནས་ཀྱི་ཚོམ་བུ་བཀོད། དཔལ་དགྱེས་པ་རྡོ་རྗེའི་ཐང་ཀ་ལ་སོགས་པ་བདེ་བར་གཤེགས་པའི་རྟེན་ཅི་ཡོད་པ་བཀྲམ། དེ་ནས་ཡི་དམ་དང་ཆོས་སྐྱོང་གི་གཏོར་མ་ལྔ་ལ་སོགས་པ་ཅི་འབྱོར་པ་བཅའ། ཕྱིའི་མཆོད་པ་ལྔ་ལ་སོགས་པ་ཅི་འབྱོར་པ་བཤམས། ཀ་པཱ་
1-2-173a
༄༅། །ལ་བདུད་རྩིས་བཀང་བ་དང་། ཚོགས་ཀྱི་ཡོ་བྱད་དང་བདུད་རྩི་ལྔ་ལ་སོགས་པ་ཡོད་ན་སྟ་གོན་བྱ། བླ་མ་ལ་ཡོན་ཅི་འབྱོར་ཕུལ་ལ་ཞུ་བ་འབུལ། དེ་ནས་བླ་མས་སློབ་མར་འོས་པ་རྣམས་ལ། འཆི་བ་མི་རྟག་པ་དང་། ཁམས་གསུམ་འཁོར་བའི་ཉེས་དམིགས། ལས་རྒྱུ་འབྲས་ལ་སོགས་པའི་གདམས་ངག་བཤད་པས་བློ་བཅོས་ལ། སྐྱབས་སུ་འགྲོ་བ་ཐུན་མོང་པ་བསླབ་བྱ་དང་བཅས་པ་བྱ། དེ་ནས་སྨོན་པ་བྱང་ཆུབ་མཆོག་ཏུ་སེམས་བསྐྱེད་པ་བསླབ་བྱ་དང་བཅས་པ་བྱའོ། །སློབ་མ་རྣམས་དཔལ་དགྱེས་པ་རྡོ་རྗེའི་གོ་འཕང་ཐོབ་པར་བྱ་བའི་ཆེད་དུ། དཔལ་དགྱེས་པ་རྡོ་རྗེའི་བྱིན་རླབས་ཞུ་སྙམ་དུ་སེམས་བསྐྱེད་བསྒོམ་དུ་གཞུག །རང་ཉིད་དགྱེས་པ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ལྷ་དགུའི་དཀྱིལ་འཁོར་རམ། ཞལ་གསུམ་ཕྱག་དྲུག་པ་ལ་སོགས་པ་གང་ཡང་རུང་བའི་བསྐྱེད་རྫོགས་བཟླས་པ་རྫོགས་པར་བྱའོ། །དེ་ནས་སློབ་མ་དེ་རྣམས་ཉམས་གྲིབ་ཅན་ལ་སོགས་པ་ཡིན་ན། ཐ་མལ་པའི་སྙིང་གར་པཾ་ལས་པད་མ། རཾ་ལས་ཉི་མའི་སྟེང་དུ་ཧཱུཾ་སྔོན་པོ་གཅིག་བསམ་དུ་གཞུག །དེ་ལས་འོད་ཟེར་ཕར་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་སྦྱང་ཚུར་འདུས་པ་ལས་རང་ཉིད་རྡོ་རྗེ་སེམས་དཔའ་རེ་རེར་གྱུར་པར་བསམ་པའི་ཐུགས་ཀར་པད་ཟླའི་སྟེང་དུ་ཧཱུྃ་ལ་ཡི་གེ་བརྒྱ་པས་བསྐོར་བར་བསམ། དེ་ལ་དམིགས་ཏེ་
1-2-173b
ཡི་གེ་བརྒྱ་པ་བརྒྱ་རྩ་བརྒྱད་བཟླས་པ་བཅོལ། དེའི་དུས་སུ་རང་རྒྱུད་ལ་ཡོད་པའི་སྡིག་སྒྲིབ་ཉམས་པ་ལ་སོགས་པ་དག་པར་བསྒོམ། དེའི་བར་དུ་བླ་མས་སྙིང་པོའམ། ཉེ་སྙིང་གང་རུང་ལ་ཅི་འགྲུབ་ཙམ་རེ་བཟླས་པ་བྱ། ཉམས་པ་ཅན་མེད་ན་མི་དགོས་གསུང་། དེ་ནས་སློབ་དཔོན་དེས་སྔགས་ཀྱི་སྐྱབས་འགྲོ་སེམས་བསྐྱེད་བྱ། དེ་ནས་ཡང་བཟླས་པ་ཅི་འགྲུབ་ཙམ་རེ་བྱ། དེ་ནས་སློབ་མ་རང་གི་སྣ་བུག་གཡས་ནས་པཾ་གཅིག་ཆད་པས། སྤྱི་བོར་པདྨ་སྟོང་ལྡན་དུ་གྱུར་ཏེ། སྣ་བུག་ཡོན་ནས་རཾ་གཅིག་ཆད་པས་ཉི་མའི་དཀྱིལ་འཁོར་དུ་གྱུར་པར་བསམ། སྙིང་ག་ནས་ཧཱུྃ་གཅིག་ཆད་པས་སྤྱི་བོར་པད་ཉིའི་སྟེང་དུ་ཕྱིན་པར་བསམ༑ དེ་ནས་འོད་འཕྲོས་པས་སེམས་ཅན་ཐམས་ཅད་ལ་ཕོག །དེའི་སྡིག་སྒྲིབ་བག་ཆགས་བསལ། ཚུར་འདུས་པ་ལས་རྡོ་རྗེ་རྩེ་ལྔ་པ་ཧཱུཾ་གིས་མཚན་པར་གྱུར་ཏེ། དེ་ཡོངས་སུ་གྱུར་པ་ལས་རྩ་བའི་བླ་མ་རུས་པའི་རྒྱན་དྲུག་དང་ལྡན་པ་བསྒོམ་དུ་གཞུག །བར་དེར་བླ་མས་མཎྜལ་སྟེང་གི་ལྷ་དགུའི་དཀྱིལ་འཁོར་ལ་དམིགས་ལ་བཟླས་པ་ཅི་འགྲུབ་གཅིག་བྱ། དེ་ནས་སྤྱི་བོའི་བླ་མའི་ཐུགས་ཀ་ནས་ས་བོན་ལས་འོད་འཕྲོས་སེམས་ཅན་ཐམས་ཅད་ལ་ཕོག་སྡིག་སྒྲིབ་སྦྱངས། ཚུར་འདུས་པ་དང་བླ་མ་ཡོངས་སུ་གྱུར་པ་ལས། དཔལ་དགྱེས་པ་རྡོ་རྗེ་ཞལ་བརྒྱད་ཕྱག་བཅུ་དྲུག་པའམ། ཞལ་གསུམ་ཕྱག་དྲུག་པ་ལ་སོགས་པ་
1-2-174a
༄༅། །གང་མོས་པ་གཅིག་ཏུ་གྱུར་པར་བསམ་དུ་གཞུག །བར་དེར་ཀ་པཱ་ལའི་ཆང་བདུད་རྩིར་བྱིན་གྱིས་བརླབས། དེ་ཚོགས་དང་མཆོད་རྫས་ལ་གཏོར་བས་བདུད་རྩིའི་རང་བཞིན་དུ་གྱུར་པར་བསམ་མོ༑ ༑དེ་ནས་དགྱེས་པ་རྡོ་རྗེའི་སྤྱི་བོ་ནས་བདུད་རྩིའི་ཆུ་རྒྱུན་བྱུང་། རང་གི་སྤྱི་བོ་གང་། ལུས་ཀྱི་སྒྲིབ་པ་དག །བུམ་པའི་དབང་ཐོབ། དགའ་བའི་ཡེ་ཤེས་རྒྱུད་ལ་སྐྱེས་པར་བསམ་མོ། །ཡང་མགྲིན་པ་ནས་བདུད་རྩིའི་ཆུ་བྱུང་། རང་གི་མགྲིན་པ་གང་། ངག་གི་སྒྲིབ་པ་དག །གསང་བའི་དབང་ཐོབ། མཆོག་དགའི་ཡེ་ཤེས་རྒྱུད་ལ་སྐྱེས་པར་བསམ་མོ། །ཡང་ཐུགས་ཀ་ནས་བདུད་རྩིའི་ཆུ་རྒྱུན་བྱུང་། རང་གི་སྙིང་ག་གང་༑ ཡིད་ཀྱི་སྒྲིབ་པ་དག །ཤེས་རབ་ཡེ་ཤེས་ཀྱི་དབང་ཐོབ། ཡང་ལྟེ་བ་ནས་བདུད་རྩིའི་ཆུ་རྒྱུན་བྱུང་། རང་གི་ལྟེ་བ་གང་། ལུས་ངག་ཡིད་གསུམ་གྱི་སྒྲིབ་པ་དག །དབང་བཞི་པ་ཐོབ། ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས་པར་བསྒོམ་དུ་གཞུག་གོ །བླ་མས་ཀྱང་ཏིང་ངེ་འཛིན་དེ་ལྟར་བྱའོ། །དེ་ནས་དགྱེས་རྡོར་གྱི་ཐུགས་ཀ་ནས་འོད་ཟེར་འཕྲོས་པས་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་ལ་ཕོག ༑དེ་རྣམས་འོད་དུ་ཞུ་བས་དགྱེས་པ་རྡོ་རྗེ་ལ་ཐིམ། དེ་འོད་དུ་ཞུ་ནས་རང་ལ་ཐིམ། རང་ཡང་འོད་དུ་ཞུ་ནས་ཇེ་ཕྲ་ལ་སོང་ནས། མཐར་ཅི་ཡང་མི་དམིགས་པའི་ངང་ལ་དར་གཅིག་བསྒོམ་དུ་གཞུག་གོ །དེ་
1-2-174b
ནས་ཆུ་ལ་ཉ་འཕར་བ་ལྟར་ཆོས་སྐུ་སྟོང་པའི་ངང་ལས་རང་ཉིད་ལོངས་སྤྱོད་རྫོགས་པའི་སྐུ་དགྱེས་པ་རྡོ་རྗེ་སྔར་ལྟ་བུ་གཅིག་ཏུ་ལངས་ཏེ། སེམས་ཅན་གྱི་དོན་བྱེད་པར་བསམ་པས་སྤྱོད་ལམ་ཅི་བདེ་བར་བྱའོ། །དེ་ནས་སྔར་གྱི་མཎྜལ་སྟེང་གི་ལྷ་དགུའི་དཀྱིལ་འཁོར་དེ་སློབ་མ་རྣམས་ཀྱི་ལྟེ་བ་ནས་ཚུར་བྱོན་པར་བསམས་གཅིག་བྱ། སློབ་དཔོན་གྱིས་ཀྱང་དེ་ལྟར་བསྒོམ། དེ་ནས་གཏོར་མ་བྱིན་གྱིས་བརླབས་ལ། གཙང་སར་སྐྱལ། ཚོགས་ལ་ལོངས་སྤྱད་པའི་རྗེས་ལ་ལྷག་གཏོར་བཏང་། བཅོམ་ལྡན་འདས་དཔལ་དགྱེས་པ་རྡོ་རྗེའི་ཏིང་ངེ་འཛིན་གྱི་སྒོ་ནས་དབང་བསྐུར་བའི་ལག་ལེན། །ཨྠིྀ།། །། རྗེ་བཙུན་ནཱ་རོ་པས་མར་པ་ལོཙྪ་ལ་གསུངས༑ དེས་མི་ལ་རས་པ་ལ། དེས་བླ་མ་ལྷ་རྗེ་ལ། དེས་དུས་གསུམ་མཁྱེན་པ་ལ། དེས་པྲཛྙཱ་ཀཱིརྟི་ལ། དེས་རིན་ཆེན་འབུམ་ལ། དེ་བླ་མ་ཁམས་པ་ལ། དེས་བླ་མ་འཇམ་དཔལ་ལ། དེས་བསོད་ནམས་དཔལ་ལ། དེས་བདག་ལའོ།། །།


目录
དགྱེས་རྡོར་གྱི་ཏིང་ངེ་འཛིན་གྱི་དབང་བསྐུར་བའི་ལག་ལེན་བཞུགས་སོ། །